آخر الأخبار :

وزارة العدل المغربية كانت دارت كونكور فالرباط لتوظيف منتدبين قضائيين من الدرجة الثالثة نهار 3 مارس 2019  (كيبدا هاد الموظف بسبعالاف درهم فالشهر إلى بغا الله).
 
دفع لهاد الكونكور ألاف الشباب و الشابات اللي عندهم الإجازة فالدراسات الأساسية أو فالحقوق.
 
جاب الله التيسير لواحد 52 شاب و شابة، نجحوا فالكتابي، و نجحوا فالشفوي، حتى قالوا صافي فُرجت و غا نمشيو نخدموا فالمحاكم.
 
حتى كيتفاجؤوا بأنه خاصهوم يدوزوا فحص طبي باش يسنيو الكونطرا، فحال إلى غا يلعبوا مع ريال مدريد.
 
جات فرملية للوزارة و بدات كتعبر ليهم فالطول و النظر و الضغط و تقلّب ليهم صدرهم، داكشي ديال سبيطار الحومة فاش كتدّي ليه ولدك دوّز ليه.
 
نهار 29 ماي اللي فات، كيتفاجؤوا هاد الشبان اللي نجحوا فالكونكور بأنهم تقصاو و تم حذفهم من لائحة الناجحين(شوف الصورة أسفله) و غا يتم تعويضهم باللي كاينين فلائحة الإنتظار، و السبب انهم غير مؤهلين صحيا حسب اللجنة الطبية السرية (اللي هي الفرملية اللي دوزات ليهم) لممارسة مهنة منتدب قضائي، فحال لا زعما غا يجريو الماراتون على الضاحية كل صباح مع الثمنية.
 
هاد الفضيحة كيقولو هاد الشبان بان موراها شي عملية بيع و شراء من داكشي الرفيع فهاد المناصب، و بان بعض هاد الشبان تعرض عليهم يحطوا عشرين مليون تحت الطبلة إلى بغاو ينجحوا او يسنيو على محضر الحذف و يوريونا عرض أكتافهم.
 
القضية وصلات للبرلمان و الشبان الناجحين مشاو دارو كونطر فيزيت و حابوا دوصي على كدو بانهم ما فيهم تا مرض و سليمين جسديا لممارسة هاد المهنة، و كيطالبوا بالحق فالمعلومة المنصوص عليها فالدستور و يشوفو هاد التقرير الصحي السري اللي دارتو الفرملية اشنو مكتوب فيه، و علاش تم إقصائهم بهاد الشكل من حقهم فهاد الوظيفة اللي نجحوا فالكونكور ديالها عن جدارة و إستحقاق.
 
بنادم فهاد لبلاد كيقرا حتا كيعيا و كيتم معاملتوا بحال البخوش، في إنعدام تام لتكافؤ الفرص و تكريس دائم لمبدأ باك صاحبي و جبد لفلوس لا بغيتي لفلوس.

الجمعة 07 يونيو 2019 - 16:06:52 / عدد التعليقات :