تعرضت اليوم لاعتداء وكريساج من طرف مراقبي les contrôleurs شركة City bus بمدينة مكناس والقصة كتالي:
صعدنا في الحافلة رقم 103 ويﻻه شي 20 دقيقو باش تحركات الحافلة المراقب كان قاعد اللور عيط على الروسفور لي تيقطع لوراق قاليه داك الدري معندوش الورقة. دري تكون عندو شي 10 سنوات فاش مشى الروسفور عند الدري قاليه ارى قطع ورقتك قاليه ها هيا عندي الورقة ووراها ليه . شوية نقز خونا المراقب لي كان اللور قاليه قطع ليه ورقة راه ماشي نتاعوا هاديك الورقة راه عطاتها ليه المرأة لي نزﻻت . قطع ليه وﻻ نزلو فواحد المنطقة خاوية وخطيرة تسمى واد ويسلان ، نطق واحد الرجل خمسيني قاليه اشريف حشومة اعتبرو خوك صغير ما تنزلوش هنا .فديك اللحطة انفجر المراقب في وجه الرجل قاليه دخل سوق راسك نتا وﻻ نزلك نتا وياااه ، قاليه الرجل ما منحقكش تنزلني قاليه نزلك ونزل مك تا هيا .المهم تدخل واحد الشاب عشريني يعمل في وكالة بنكية قاليه انا نخلص تذكرة صافي ، قاليه المراقب والله ما يخلصها شي حد، يخلصها هاد الرجل لي نطق وﻻ ينزل هو والدري . قاليه داك الشاب اودي هادشي راه ماشي فوضى تنزل لي بغيتي وتطلع لي بغبتي ، هنا توجه المراقب بالشتم والسب ليه ومشا باغي يضربو شاب، الناس كولشي تيصفر ويغوت ، هز تلفونو المراقب عيط لصحابو قاليهوم تسناونا حدا marché centrale .
المهم انا كنت غادي ننزل قبل هاد المحطة لكن قلت حشومة انا حضرت الفيلم من الاول خاصني نشهد فهاد القضية و سمحت في خدمتي وكملت تا لمحطة الموعودة . بالحبسة نتاع الطوبيس طلعو شي ستة وﻻ سبعة نتاع المراقبين شي ﻻبس الجيلي شي ﻻ .
بمجرد الصعود نتاعهوم بداو يخبطو فداك الرجل وداك الشاب بالعصى .هنا مقديتش نتمالك راسي وبصفتي مواطن مغربي من مسؤوليتي نوثق هاد الاعتداء جبدت التلفون نتاعي صورت الاعتداء شوية شافني احد المراقبين قالهوم راه تيصور فإدا بهوم تيهجموا عليا كاملين واحد فيهوم حيد ليا النضاضر وجوج اخرين شدوني ونزلوني من طوبيس وبالقوة سرقوا ليا البزطام من الجيب والتلفون . يلاه جيت نقوليه ارا التلفون واحد فيهوم غفلني بدون سابق انذار بلكمة لانفي لي رعفاتني صافي بقيت بﻻصتي تا مشا واحد السيد جابلي البزطام والتلفون ومجابش النضاضر البزطام كانت فيه 1000 درهم بقات غير 150 درهم و التلفون حيدو منو لكارط ميموار عند بالهوم فيها الفيديو ساعة انا داير الفيديوات نيشان تيدوزو للتلفون ماشي للكاراط مموار وشاب والرجل مكرفصين بالضرب عيطنا لاسعاف والشرطة جاو مشينا مع الاسعاف لمستشفى محمد الخامس ولقينا الكونطرول لي تعدا علينا مع جوج من شركة city bus طوا صبعوا وقالك ضربناه ودار شهادة طبية .وحاليا راحنا وكلنا شي خمسة نتاع المحامين مع الشواهد الطبية لي فيها مدة العجز تسمح بالاعتقال زائد الشهود وان شاء الله لن اتراجع تا نصفيوا هاد الظلم لي قهرو الناس بيه وكنطلب المساندة الاعﻻمية من الاصدقاء راه هاد حملة زيرو كريساج تتعنينا كاملين اليوم انا غدا تقدر تكون نتا .
محمد أمين صالح عليوني

https://www.facebook.com/mohamedamine.alyouni/posts/12266818906976
62