آخر الأخبار :

الهوية يحددها واش نتا مزلوط اولا مرفح بوان فينال

ملي المغرب ممر عبور بين شعوب الجنوب و الشمال و الشرق، ها اللي غادي ها اللي مستقر بحال محطة ولاد زيان مكبرة، كيفاش تكون الجرأة عند شي بعضين يتكلمو على نقاء عرقي و الجزم أن المغاربة عرب أو أمازيغ؟

سكان المغرب الأولون أي الأمازيغ هم أصلا خليط هجرات بعضها جاء من أوروبا و بعضها من ايفريقيا الغربية و زيد عليهم بعض العبرانيين و المصريين،هذا الخليط تخلط مع راسو ثاني و أنتج شعب مخربق عرقيا،كل فترة تاريخية تنضاف هجرة ما سواء يمنية أو اسبانية وكل هذشي من غير الغزوات: ها القرطاجيين اللبنانيين و من بعد الرومان و الوندال و الويل الكحل.

و من بعدهم الضربة الكبيرة ديال العرب و هجرة قبائل بالكامل، أسطورة الشعب النقية جيناته تهزها تهرسها على راس أي واحد كايقولها تجيب ليه غير بورتريهات وجوه مغربية موصوفة أو مرسومة من حوالي ألفين عام تلاقا فيها كل واحد مختلف على الاخر بالرغم من طريقة الرسم، ممكن تخرج منها شي ستة الأعراق.

من بعد زادو ثاني هجرات الحميرية و الزيدية اليمنيين و الهاشميين المطرودين و بنو هلال و معقل و هوارة من قبل 700 سنة،و عبيد البخاري و الطوارق و في الأخير نزلو الموريسكيين المطرودين من الأندلس اللي كلهم مخلطين : يهود و قشتاليين و كطلان و برتقيز، و واحد العرام ديال شعوب الشام اللي كانوا عاطينها للنشاط و اللي هما أصلا كرد ولا عرب ولا ترك ولا ما نعرف اش من جايحة منين جاو...

ومن بعدها جاو ثاني الاوروبيين تزادو على العرام الأصلي، و بقا الزمر كلو كايتزوجو من بعضياتهم، ولا عندنا دابا التيمومي مغربي و حجي مغربي و سهام أسيف مغربية و الياس العماري مغربي و باطما مغربي و بنكيران مغربي و الفاسي الفهري مغربي ، ها السمر ها الكحل ها الشقر ها عنينين زرقيين ها الخضريين و يجي شي نم يقول ليك الهوية العربية ولا أمازيغية.

الهوية - عرقيا و ثقافيا و لغويا - تخربيقة دينامية غير ثابتة.
الهوية الثابتة حاليا هي واش أنت مزلوط ولا من الذين لا بأس عليهم بوان فينال.

من صفحة الدغبوش




نشر الخبر :
عدد المشاهدات
أرسل لأحد ما طباعة الصفحة
الرجاء من السادة القراء ومتصفحي الموقع الالتزام بفضيلة الحوار وآداب وقواعد النقاش عند كتابة ردودهم وتعليقاته،وتجنب استعمال الكلمات النابية أو الحاطة للكرامة الإنسانية.