الخبر:الموغريب هو البلد الوحيد في العالم لي ....وهانياتون
(الأقسام: تفاعل الشبكة)
أرسلت بواسطة موقع ينايري
الاثنين 01 يناير 2018 - 19:36:41


المغرب هو البلد الوحيد فالعالم اللي زاد فثمن تنبر الباسبور ب 66%...من 300 ل500 درهم ..وهاااانياتون.
 
المغرب هو البلد الوحيد فالعالم اللي إيلا بغيتي تدخل فيه عداد الكهرباء خاصك تخلص قريب 1200 درهم رغم أن العداد كايبقى بسمية المكتب اللاوطني ...وكذلك بالنسبة لعداد الماء اللي خاصك تخلصوا ب 4000 درهم باش فاللخر تخرج فمظاهرات تندد بارتفاع مبلغ الفواتير بعد الجريمة اللي اقترفها بنزيدان إبان ولايته غير المأسوف عليها...وهااانياتون
 
المغرب هو البلد الوحيد فالعالم اللي خاسر الفلوس فيما يسمى بالمغرب الأخضر باش فاللخر ماطيشة تدير 10 دراهم للكيلو وزيت الزيتون 50 درهم للتر الواحد...وهاااااانياتون
 
المغرب هو البلد الوحيد فالعالم اللي إيلا مرضتي كاتداوى فكلينيك ديال ساهام صونطي ...وكاتشري الدوا من عند ساهام فارما وكاتصيفط الميتييل لساهام أسيرونص ....وهااااانياتون
 
المغرب هو البلد الوحيد فالعالم اللي فوقما بانتلو كايبدل لاكارط ناسيونال باش عباد الله تخلص قريب 100 درهم للراس...وهااانياتون
 
المغرب هو البلد الوحيد فالعالم اللي المحروقات ماكاتهبط بحتى فرانك واخا برميل النفط يدير خمساوربعين ريال فالسوق العالمي....وهااانياتون
 
المغرب هو البلد الوحيد فالعالم اللي رخصة البناء كاتدوز من 1000 ل 8000 درهم بمجرد توقيع....وهانيااااتون
 
المغرب هو البلد الوحيد فالعالم اللي شيفور ديال كار خدم 45 عام....خاصوا يدوز فورماسيون ديال البطاقة المهنية ب 6000 درهم لاحقاش بوليف بانتلو....وهااااااانياتون
 
المغرب هو البلد الوحيد فالعالم اللي الاقتطاعات ديال التقاعد كاتزيد هي وسنوات العمل ..ألوغ كو مبلغ المعاش كاينزل....وهااانياتون
 
المغرب هو البلد الوحيد اللي فاش كاتخرج مدينة كاتحتج كايطلقوا عليها العولاما يقولوا ليها....كالما كالما...واش بغيتو ترجعونا بحال سوريا.......وهانياتون
 
المغرب هو البلد الوحيد اللي عندو قمر صناعي....ومازال الناس كاتموت فالساندريات......وهاااانياتون
 
المغرب هو البلد الوحيد اللي يقدر برلماني يجمع 8 ديال التعويضات بالملاين باش يخرج يقول أن اللهطة هي اللي قتلات شهيدات الصويرة......وهااااااانياتون...
 
المغرب هو البلد الوحيد اللي 3 شهور وهو غادي بلا وزير دالصحة....وهاااااانياتون
 
المغرب هو البلد الوحيد فالعالم اللي 60 عام هادي وهو باغي يصلح التعليم وكل عام كايخرج مخطط استعجالي كايثبت الغباء ديالو.....وههااااانياتون
 
المغرب هو البلد الوحيد فالعالم اللي فوقما خوا شي صندوق كايدوروا يشوفوا فجيب المواطن باش يعمروا...وهانياااتون..
 
المغرب هو البلد الوحيد اللي فارض ضريبة على الأداء نقدا....وهاااااانياتون.
 
المغرب هو البلد الوحيد فالعالم اللي كاتخلص فيه ضريبة على التلفزة ففواتير الكهرباء واخا ماعندكش تلفزة أصلا...وهاااانياتون
 
المغرب هو البلد الوحيد فالعالم اللي إيلا مشيتي للسبيطار كايعطيوك رونديفو على عامين.....وهاااانياتون
 
المغرب هو البلد الوحيد اللي كاتشري فيه الشراب من بيسري مرخص له وإيلا تلاقاوك صحاب الحال كاتمشي للبنيقة بتهمة حيازة مشروبات روحية....وهاااانياتون.
 
المغرب هو البلد الوحيد فالعالم اللي تقدر سطافيط تتبعك على ود أنك مادايرش حزام السلامة ....وفاش توقف كاتلقى البوليسي اللي تابعك حتى هو مادايرهاش.....وهااااااانياتون
 
المغرب هو البلد الوحيد فالعالم اللي كايغامر فيه الجادارمي بحياتو فاش كايتخبالك فوق الشجر فلوطوروت باش يديرليك بروسي...حفاظا على سلامتك حكا والواد....وهااانياتون
 
المغرب هو البلد الوحيد فالعالم اللي كاتقرى فيه ب1500 درهم فالشهر مدة 3 سنين باش فاللخر تخدم ب1000 درهم فكلينيك بريفي.... وإيلا لقيتيها....وهااااانياتون
 
المغرب هو البلد الوحيد فالعالم اللي ايلا قريتي كاتاكول لعصا قدام البرلمان ..وايلا ماقريتيش كايعطيوك تريبورتور باش تاكل لعصا فاش تبيع وتشري بيه.....وهانياااااتون
 
المغرب هو البلد الوحيد اللي كايخرج فيه شخص من الحبس واخا شفر ميزانية بنك على قدو برخصة مؤقتة كاتدوم هادي كتر من عامين....لكن المواطن البسيط يقدر يضرب عامين دالحبس الا ماقدرش يخلص ليزانتيريس ديال لكريديات اللي عاطيه نفس البنك....وهااااااااانياتون
 
المغرب هو البلد الوحيد فالعالم اللي تقدر اتصالات المغرب تعلق فوق راسك ريزو يعلم الله المخاطر ديالو وفاش تمشي للمحكة تشكي يحكم القاضي بعدم الاختصاص....وهاااااااانياتون
 
المغرب هو البلد الوحيد فالعالم اللي .....إلخ إلخ إلخ و....
 
#هااااانياتون



قام بإرسال الخبرينايري موقع مغربي للتعبير الحر
( http://yennayri.com/news.php?extend.4763 )