ساحة لمامونية - صندوق لبريد 1015
رباط
المغرب
فاكس : 05.37.26.31.03

لموضوع : طلب تْحريك شكاية موقْفة، ضْدْ كبار لمسؤولين فوزارة داخلية.

أزول،

أنا لِّي مسيني لتحت، شكير مزيغ، ناشط حقوقي وْ واحد من ضحايا تَّدخل لقمعي لي تعرضات ليه لْوَقفة سلمية ضد لعفو لملكي على لپِّيدوفيل دانييل گالڤان، كندين تَّماطل لي كيعرفو لملف ديال مجموعة من لمناضلين و نَّاشِطين لحقوقيين لي تْعرضو بحالي لضَّرب و لْجرح، غير حينت شاركو فوقفة سلمية كتْسْتنكر لعفو على مجرم غتاصب كتر من حضاش وليَّد و بْنيْتة. و لي حتى ديوان لملكي عتارف بأنه كان خطأ.

وْ كان لأتلاف لمغربي لهيئات حقوق لإنسان رفع دعوة قضائية بْنِّيابة على ضَّحايا للوكيل لعام بمحكمة نَّقض ديال رباط، بتاريخ 8/8/2013 يعني هادي عام بْضَّبط. و لحدود لْكْتابة ديال هاد لْبْرِيَّة ما تحركاتش لمسطرة، و ما تعينش قاضي تْحْقيق. مع أنه وْزير دَّاخلية سابق سّي مْحْند لعنصر نفسو كان عطا لأمر باش يتحل تحقيق داخلي باش يْتْبانو لمسؤولين على هاد تَّدخل لهمجي. و لهاد ساعة باقي ما خرجوش نتائج ديالو. نفس شي كينطابق على تْحقيق لي وعدتو بيه، و لي ما عرفناش لمصير ديالو حتى هوا.

كندكر سيادتكم بانه فْتْصريح لي عطيتو للقناة تانية كنتو شهدتو بأن لوقفة كانت سلمية و ما خاصهاش ترخيص. و به، فالتدخل كان خارْج على لقانون، حينت صور و لڤيديوات كتبين بأن تضاهرة ما كانتش كتشكل لا خطر لا عرقلة لنضام لعام. زيد عليه، سلطات ما تبعاتش لمسطرة لقانونية لفض تضاهرات.

كنتير نتباهكم أن من بين شعارات لي لحزب ديالكم قتابسها من لحراك شعبي و هزها معانا خلال لحملة لِنْتخابية ديالو كان إسقاط لفساد و لإستبداد. و هاد جوج ما يمكنش يطيحو إلى ما قطعناش مع لإفلات من لعقاب. نتمنا أنكم تكونو باقين متشبتين بشعراتكم و تتعاونو معانا سيدي لوزير باش نساليو مع لماضي لي كان فيه لميزان ميل على ضْعيف. و ما تنساوش " إنما أهلك الذين من قبلكم أنهم كانوا إذا سرق فيهم الشريف تركوه ، و إذا سرق فيهم الضعيف أقاموا عليه الحد " .

فْلْخْرْ و كيف كتعرفو كتر مني، لمغريب صادق على لتفاقية لعالمية ديال لحقوق لمدنية و سياسية، لي كتضمن حرية تَّعبير و تَّضاهر، و حق تَّقاضي لعادل قدام محاكم مستقلة. هاد شي علاش كنطلب من سيادتكم بْصفْتكم رَّيْس ديال نيابة لعامة، بلأصالة عليا و بالنيابة على ضَّحايا لْخْرين، توفيو بلتزماتكم، و تحركو لمسطرة لي هادي عام و هي موَقْفة. باش يتحاسبو لمسؤولين على هاد لجريمة يكونو من كانو.

تحياتي،

شكير مزيغ 8 غشت 2014

تسيفطات نسخة ل:

سي دريس ليازامي، رَّيْس ديال لمجلس لوطني لحقوق لانسان
سي حمد لهايج رَّيْس ديال لجمعية لمغربية لحقوق لإنسان
سي عبد صمد صدوق رَّيْس ديال لجمعية لمغربية لمحاربة رشوة
سي محمد زهاري رَّيْس ديال لعصبة لمغربية لدفاع عن حقوق لإنسان
لالة أمينة بوعياش كاتبة عامة ديال لفدرالية دولية لحقوق لإنسان