من شحال هادي والمخزن يتسكت فالأصوات المعارضة ، ومن شحال هادي تيقلب أنه يبدع أساليب كثيرة فالقمع، من السجن والتعذيب والإختطاف و الإغتيال، وطبعا كلشي هادشي تيلقى ليه مبرر شرعي وقانوني، مثلا ناس لي صيفط بقرون ديال السجن فتزمامارت كانت التهمة هي انهم كانوا بغاو إينقالبو علا المليك وعلا الحكم، ودفن هاد العسكريين تحت الأرض بلا محاكمة، كاين لي قال بللي را داكشي لي تيصلح ليهم حيت بغاو إيقتلو المليك، كاينين صحفيين كثااار دافعو علا القمع د الحسن الثاني بهذيك الطريقة الوحشية للعسكر، وكاينين نماذج كثيرة فتاريخ المغرب علا دعم المواطن البسيط وحتى شي موثقافين للقمع بحجة أن ما يقم به الشخص المقموع غير قانوني. ممكن تخرج فمظاهرة وتعرض للقمع ويقول المخزن: "بأنه معندكش رخصة لتظاهر" . وطبعا كاين البسطاء فتحليل الامور تيتيقو الدعاية المخزنية لأنها " قانونية ". أه واحد القضية أخرى، يمكن كااع الشباب تيتافق عليها وهي أنك إيلا بغيتي تكون مناضيل را خاصك تحتارم القانون، القانون لي تينظم الحياة والدولة عموما، حيت إيلا مكاينش هاد القانون راه غتكون الفوضى، حيت حنا شعب همجي ومتخلف وما يصلح ليه من غير القمع والكبت.
ياك كاع كاينين مفكرين تيدعمو هاد القضية ديال أننا شعب متخلف، مثلا الشاعر أدونيس تيقول :" بللي الحرية عبئ على الإنسان العربي ".هاد المقولة تيستعملوها الناس لي تيعارضو شي حاجة أسميتها المظاهرات والتجمهرات وداكشي، وكلشي خصو إيكون فإطار القانون المنظم للحياة .
الأمثلة ديال القمع فالمغرب تتكون بإسم الحفاظ علا الأمن والامان، والقمع ديال المخزن تيكون بغطاء قانوني مضلل،إيلا معطاوكش الوصل ديال شي جمعية تيقولو ليك الجمعية غير قانونية، وشكون للي غيعطيك الوصل من غير الدولة !! بالتالي الدولة تتميز بين فئات المجتمع ها لمعارض ها الموالي وبيناتهم بجوج تينعس مولاي القانون علا الجنب للي تيريح الدولة .
وطبعا كاينين ناس لي غيدافعو علا الدولة ويقولو الحاجة للي مجاتش بالقانون حنا ضدها، بلاتي نسولكم بعدا !!! علاش الدولة مستقلة ؟ علاش الدولة محايدة؟ أجي واش ناهي الدولة من غير القضاء و الإعلام والبوليس و المدرسة و المؤسسة الدينية ؟ علاش هادو عندهم شي إستقلالية بعدا ؟
اللي بغيت نقول وهو أن القانون مديور باش يقمع شي وحدين ويدافع علا شي وحدي، مامديور باش إيكون محاييد وتيتفرج حتى يتخاصمو ناس عاد يدخل علا الخط .
المهم الهضرة كثيرة ندوزو للمهم ولمفيد .
شي وحدين هازين سلاح القانون وإحترام الافراد وعدم الشخصنة، فوجه أي واحد يمكن يكتب جملة أو قصيدة أو قصة أو أوأو....مع العلم أنهم هما نيت تيشخصنو وتيتجاوزو القانون للي تيدافعو عليه اليوم فقضية "حسن الحافة " .
حسن الحافة كتب جمل أدبية بسيطة جدا تيوصف جمال زوجة القايد وقال بللي سعادة القايد تيتمتع مع الزين ليلا ونهارا تيتبورد علا سكان الدوار .بسبب هاد جوج كلمات علا مصونة القايد تم الاعتقال ديالو نهار لخميس.
المهم شي وحدين قالو بللي هدا كلام زنقاوي وماشي ديال المناضلين وكاين للي قال من حقو إيعبر كما بغا خصوصا أنه محددش اسم القائد أو اسم زوجته أو حتى اسم الدوار ،وكاين للي قال بللي سعادة القايد تعامل بشكل حضاري فاش مخلاش دار بوه ومشا للقضاء !!
القضية ولا فيها نقاش عاوتاني ها المتفق مع حسن الحافة ها للي عتبرو برهوش ومنادل !!
قبل منصدرو حكم علا المعتقل حسن الحافة أجي نديرو إطلالة سريعة علا ما تم تدوينه مؤخرا من أمور مشخصنة ولا تحترم القانون ولم يتحرك لا القانون والقضاء ولا القدر في إعتقال من دونها .
بمن غنبداو ؟
1- نبداو من التيار الإسلامي للي تيهاجم فعباد الله صباح مساء بشكل شخصي وبذكر الاسماء نعام أسيدي، ياك الشيخ النهاري هدر دم الصحفي المخزني المختار لغزيوي لانه ديوت، مع العلم أن القضية فيها تحريض صريح علا القتل بل التهديد بالقتل على الملأ بالصوت و الصورة، وبدون إحترام للقانون كاين شي حد عتاقلو؟
2- الشيخ صار للي ولا سمسار فأعراض الناس وللي داير وكالة تزوج العزاب، ياك صور المؤخرات ديال بنات الناس بالصورة والصوت وعرضهم ودافع علا الفعل ديالو، بكل جرأة وخنزر فجمعيات النساء حتى تكرشات ومقدرات ترفع تا دعوة قضائية ..والفعل ديالو خلق نقاش وطني كاااع ..واش كاين شي حد عتاقلو؟
3- ياك أسيدي كاع الفيسبوكيين تيسبو الشعب المغربي كل نهار وتيقولو بللي هذا ماشي شعب هذا غي " شعيبة " واش هادي ماشي إهانة للشعب المغربي عموما وتستحق الإعتقال ؟
4- وشحال من مدون كتب بللي الشعب المغربي تيصلح ليه غير القمع حيت معندوش كرامة ومتيخرج يحتج علا الوضع، وبحال هادو كثااار فلفيسبوك حيت تيكونو إنطباعيين هاهما مع الشعب هاهما ضدو، علاش فاش تيقولو بللي الشعب المغربي معندوش كرامة واش متيسبوش الشعب بلمقاومين ديالو للي دفنو تحت أنقاض مدافع المستعمر، والمناضلين ديالو للي فناو عمرهم فلحبسات ديال النظام، وبنساء ورجال للي تيخرجو يوميا للشوارع فمظاهرات خبزية ؟ را هدو للي تيقولو هاد الهضرة خصهم الحبس هما وللي دايرين ليهم جيم .
5- واش مول الفردي ومول الشاقور ومول الدلاحة ومول الكاسكيطة للي تيهدو الناس ويسبوهم وتيدفلو عليهم فكل فديو ميستحقوش الحبس تا هما والإعتقال ؟ واش كاين شي حد عتاقلهم ؟؟؟
الهضرة كثيرة كما قلت ليكم، والأمثلة كثيرة بزااااف، حسن الحافة تعتاقل حيت كتب جوج سطور بطريقة أدبية غاية فلبساطة، وكاين للي تيكتب أكثر منو و تيستعمل عبارات ذات مدلول جنسي مباشر وبشكل أكثر جرأة ...علاش حسن يتعتاقل ؟؟ مع العلم أنه ممكن تم المتابعة ديالو فحالة صراح هذا إيلا كان هناك فعل يستحق المتابعة اصلا حيت السيد لا يشكل أي خطر متيعضش ومفيهش الجربة باش تشدوه .
بمقارنة الفعل " الجرم " المنسوب للسيد حسن الحافة " التغزل بمفاتن زوجة القايد والتهكم علا سعادة القايد " وبناءا على صك الاتهام حكمة المحكمة ديال شي وحدين أللي تيحتارمو القانون واللي قالو بللي حسن خصو ترابي وبللي برهوش ومنادل وصلكوط .
وبالمقارنة مع كاع داكشي للي تيتنشر فلفيسبوك من صور وكتابات وفليوتيوب من فديوهات علا عباد الله وعلا الأعراض ديالهم، أظن أن حسن الحافة يستحق الإعدام.
ينايري مزعزع